-
कालोपाटी सम्बाददाता
काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेको राहदानी दुरुपयोगसम्बन्धी रिटको पेसी आगामी चैत १८ गतेका लागि सरेको छ । सोमबार न्यायाधीश हरि फुयाल र नृपध्वज निरौलाको इजलासमा हेर्न नभ्याइनेमा परेर स्थगित भएको मुद्दामा चार महिनापछिको पेसी तोकिएको हो ।
महान्यायाधिवक्ताले मुद्दा नचल्ने निर्णय गरेपछि युवराज सफलले बदरको माग गर्दै २०७९ चैत २० गते सर्वोच्चमा रिट दायर गरेका थिए । यस मुद्दामा यसअघि सर्वोच्चले तीनपटक फाइल मगाउने निर्णय गरेको छ । रिटमा राहदानी दुरुपयोगमा लामिछानेविरुद्ध मुद्दा चलाउन अन्तरिम आदेश माग गरे पनि न्यायाधीश फुयालको इजलासले अन्तरिम आदेश दिन अस्वीकार गरेको थियो । हाल लामिछाने सहकारी ठगी प्रकरणमा पक्राउ गरेर अनुसन्धानका लागि थुनामा छन् ।
