कांग्रेस–कम्युनिष्टको सरकारले संघीयताको कार्यान्वयन गरेनः अध्यक्ष यादव

काठमाडौं । जनता समाजवादी पार्टीका अध्यक्ष उपेन्द्र यादवले कांग्रेस–कम्युनिष्ट नेतृत्वको सरकारले संविधानमा व्यवस्था गरिएको संघीयताको प्रभावकारी कार्यान्वयन नगरेको आरोप लगाएका छन् ।

बुधबार काठमाडौंमा आयोजित कार्यक्रममा बोल्दै अध्यक्ष यादवले संघीयता कार्यान्वयनका नाममा सरकार केवल भाषणमा सीमित भएको बताए । उनले प्रदेश र स्थानीय तहलाई संविधानअनुसार अधिकार, स्रोत र साधन हस्तान्तरण नगर्दा संघीयता कमजोर बन्दै गएको दाबी गरे ।

अध्यक्ष यादवका अनुसार संघीयताको मूल मर्म समावेशिता, स्वशासन र जनताको पहुँचमा सेवा पुर्‍याउनु भए पनि वर्तमान सरकारले केन्द्रीकृत सोचबाट बाहिर ननिस्किएको छ । “संघीयता कार्यान्वयन नगरी लोकतन्त्र बलियो हुन सक्दैन,” उनले भने ।

उनले संघीयता विरोधी गतिविधि रोक्न तथा संविधानको पूर्ण कार्यान्वयनका लागि दबाबमूलक आन्दोलन आवश्यक पर्न सक्ने चेतावनी समेत दिए ।