युवराज सफलद्वारा ललित कला प्रज्ञा प्रतिष्ठानको भ्रष्टाचार विरुद्ध विरोध प्रदर्शन

काठमाडौं । सामाजिक अभियन्ता युवराज सफलले आज ललित कला प्रज्ञा प्रतिष्ठानको भ्रष्टाचार विरुद्ध विरोध पदर्शन गरेका छन् ।

बुधबार ललित कला प्रज्ञा प्रतिष्ठान केन्द्र अगाडी प्रतिष्ठानको भ्रष्टाचार विरुद्ध अभियन्ता युवराज सफलले भण्डाफोर कार्यक्रम गरेका हुन् । उनले प्रतिष्ठानले ४१ वटा मूर्तिहरु बनाउन लुम्बिनी प्रदेशसँग सम्झौता गरेको जानकारी दिँदै ललितकला प्रतिष्ठान आफूपनि ठेकेदार भएको बताए ।

‘ललित कला प्रज्ञा प्रतिष्ठानले ४१ वटा मूर्तिहरु बनाउन पर्ने त्यसका लागि कुल १ करोड ३६ लाख बराबरको लागत अनुमान गरिएको छ । यो कार्य लुम्बिनी प्रदेश सरकार र नेपाल ललित कला प्रज्ञा प्रतिष्ठानबीचको सम्झौता र सहकार्यबाट अघि बढ्दैछ । यहाँ सयौँ, हजारौँ मूर्तिकारहरु नेपालमा छन् । मूर्ति बनाएर नै आफ्नो जीवन चलाउने मान्छेहरु यहाँ हुनुहुन्छ । तर यहाँ मान्छे हुँदा हुँदै यो ललितकला प्रतिष्ठान आफूपनि ठेकेदार भएछ । यसले ठेकेदारीको काम गर्न कहिलेदेखि सुरु गर्र्यो,’ उनले भने ।

विरोध सभा कार्यक्रममा ललितकला प्रतिष्ठानले आयातित मुर्तिहरू पुर्ण रूपले बन्द गर्नुपर्ने र नेपाली मूर्तिलाई निर्यात गर्ने वातावरण सिर्जना गरिनु पर्ने, नेपाल ललितकला कलाकर्मीको श्रमिकको दर रेट कायम गर्नुपर्ने, बार्षिक ललितकला प्रदर्शनी गर्दै गर्दा मर्यादित तवरले कामको मुल्याङ्कनको आधारमा पुरस्कृत गरिनुपर्ने लगायत मागहरु राखेका छन् ।