निर्वाचन आयोगले सुरु गर्‍यो कल सेन्टर, मतदाता र नागरिकका जिज्ञासा सुन्ने सुविधा

काठमाडौँ । फागुन २१ गतेको प्रतिनिधि सभा सदस्य निर्वाचनलाई लक्षित गर्दै निर्वाचन आयोगले सोमबारदेखि कल सेन्टर सुरु गरेको छ। आयोग परिसरमा स्थापना गरिएको यस कल सेन्टर मतदाता, नागरिक र सरोकारवालाका जिज्ञासा सुनुवाइका लागि सञ्चालनमा आएको प्रवक्ता नारायण प्रसाद भट्टराईले जानकारी दिनुभयो।

भट्टराईका अनुसार, “कल सेन्टर आजबाट सुरु भएको छ। हाल कार्यालय समय बिहान ९ बजेदेखि साँझ ६ बजेसम्म सेवा दिइँदैछ। समय क्रमश: थपिँदै जानेछ।”

कल सेन्टरमा ६ वटा डेस्कमार्फत सेवा प्रदान गरिनेछ। मतदाता, नागरिक वा सरोकारवालाले नि:शुल्क टोल-फ्री नम्बर ११०२ मा कल गरेर आफ्ना प्रश्नहरू राख्न सक्नेछन्। एकैपटक १५ जनासम्मले फोन गर्दा पनि कलहरू होल्डमा राख्नुपर्ने छैन।

निर्वाचन आयोगले जानकारी दिएको छ कि यो कल सेन्टर निर्वाचित उम्मेदवारलाई प्रमाणपत्र वितरण हुने अवधिसम्म सञ्चालनमा रहनेछ।