प्रदीप गिरीको क्षेत्रबाट चुनाव लड्ने सरिता गिरीको घोषणा, सहयोग लागि सबैसँग आग्रह

काठमाडौं । प्रदीप गिरीकी भाइबुहारी सरिता गिरीले आगामी प्रतिनिधिसभा निर्वाचनमा सिरहा १ बाट चुनाव लड्ने घोषणा गरेकी छन् । बुधबार मात्र सदभावना पार्टी परित्याग गरेकी गिरीले बिहीबार बिहान सामाजिक सञ्जालमार्फत चुनाव लड्ने घोषणा गरेकी हुन् ।

लामो समयसम्म मधेस केन्द्रित दलमा रहेर राजनीति गर्दै आएकी गिरी स्वतन्त्र वा कुन दलबाट चुनाव लड्दै छिन् भन्ने खुलेको छैन । बुधबार उनले दिवंगत कांग्रेस नेता प्रदीप गिरीको आग्रहअनुसार आफूले सदभावना पार्टी परित्याग गरेको बताएकी थिइन् ।

उनले लेखेकी छन् म सिरहाको १ नम्बर निर्वाचन क्षेत्रबाट सांसद पदका लागि निर्वाचन लड्न गइरहेको छु । यो आधिकारिक घोषणा हो । सबैजनासँग सहयोगका लागि विनम्रतापूर्वक आग्रह गर्दछु । २०५६ को निर्वाचनबाहेक सबै निर्वाचनमा प्रदीप गिरी सिरहा १ क्षेत्रबाट विजयी हुँदै आएका थिए ।