चार क्विन्टल गाँजासहित २ भारतीय नागरिक पक्राउ, थप अनुसन्धान जारी

काठमाडौँ । चार क्विन्टल गाँजासहित २ भारतीय पक्राउ परेका छन् । जिल्ला प्रहरी कार्यालय चितवनले ३ सय ९६ किलो लागुऔषध गाँजासहित २ जना भारतीय नागरिकलाई पक्राउ गरेको हो ।

पक्राउ पर्नेमा भारतको उत्तर प्रदेश सम्बल जिल्ला बैजई थाना पूरा गाउँका ४५ वर्षीय अनिल गिरी र केलादेवी थाना अपावती कुतवपुर गाउँका ३७ वर्षीय राजपाल सिंह छन् । उनीहरुलाई प्रहरीले मङ्गलबार साँझ पक्राउ गरी सार्वजनिक गरेको हो ।

यस्तै, जिल्ला प्रहरी कार्यालय चितवनका प्रवक्ता प्रहरी नायब उपरीक्षक विजयराज पण्डितका अनुसार उनीहरुलाई भरतपुर महानगरपालिका-१ स्थित आँपटारीबाट पक्राउ गरेको हो । उनीहरुले भारतीय नं प्लेटको जेएच ०२ डब्लु ९६३१ नंको ट्रकमा क्याबिनको भागमा फल्स बटम बनाई प्लास्टिकको बोरामा २८ पोका लुकाई-छिपाई मुग्लिनबाट नारायणगढतर्फ ल्याउँदै गर्दा पक्राउ गरेको हो ।

प्रहरी उपरीक्षक रामेश्वर कार्कीसहितको टोलीले उनीहरुलाई पक्राउ गरेको छ । पक्राउ परेका व्यक्तिहरुको थप अनुसन्धान भइरहेको प्रहरीले जानकारी दिएको छ ।