कांग्रेस विशेष महाधिवेशन : दिउँसोसम्म १,३२७ प्रतिनिधिद्वारा नाम दर्ता

काठमाडौँ। नेपाली कांग्रेसको विशेष महाधिवेशन आजदेखि काठमाडौँको भृकुटीमण्डपमा सुरु भएको छ। महामन्त्रीद्वयको अगुवाइमा आयोजना गरिएको दुई दिने महाधिवेशनको नाम दर्ता प्रक्रिया बिहान ९ बजेदेखि आठ वटा ‘स्टल’ मार्फत चलिरहेको छ।

विशेष महाधिवेशन पक्षधर समूहका संयोजक युवराज पाण्डेयका अनुसार दिउँसो १:३० बजेसम्म १,३२७ प्रतिनिधिले नाम दर्ता गरिसकेका छन्।

कांग्रेसले प्रतिनिधिहरूलाई प्रदेश र विशेष क्षेत्रअनुसार छुट्टाछुट्टै स्टलमा दर्ता गर्ने व्यवस्था गरेको छ। कर्णाली र सुदूरपश्चिमका लागि एक स्टल, विदेशस्थित जनसम्पर्क समिति, भ्रातृ संस्था र शुभेच्छुक संस्थाका लागि एक स्टल, उपत्यकाका काठमाडौँ, भक्तपुर र ललितपुरका लागि एक स्टल, बाँकी पाँच प्रदेशका लागि छुट्टाछुटै स्टलको व्यवस्था गरिएको छ।

देशभर कांग्रेसमा ४,७४३ महाधिवेशन प्रतिनिधि रहेका छन्। उद्घाटन अघि सहभागीहरूले काठमाडौँका विभिन्न ६ ठाउँबाट जुलुस निकालेर महाधिवेशन स्थलमा प्रवेश गरेका थिए।

संयोजक पाण्डेयका अनुसार उद्घाटनसत्रपछि भृकुटीमण्डपको सभाहलमा बन्दसत्र सञ्चालन हुनेछ।