ओली-देउवा र प्रचण्डमाथि सम्पत्ति शुद्धीकरणमा अनुसन्धान सुरु

काठमाडौं । जेन-जी आन्दोलन जाँचबुझ आयोगको प्रतिवेदनमा गरिएको सिफारिस बमोजिम प्रहरीले राजनीतिक दलका नेता र तीनको सघन समूहका सदस्यमाथि सम्पत्ति शुद्धीकरण मुद्दाको अनुसन्धान अगाडि बढाएको छ ।

प्रहरी स्रोतका अनुसार जेन-जी आन्दोलनका क्रममा घरमा आगजनी हुँदा केही नेताको घरमा रकम भेटिएको आधारमा सम्पत्ति शुद्धीकरण अनुसन्धान विभागले गरेको प्रारम्भिक अनुसन्धानलाई पूर्णता दिँदै थपमाथि पनि प्रहरी अनुसन्धान अगाडि बढ्न लागेको हो । आइतबार बिहान नेपाली कांग्रेसका नेता तथा पूर्वमन्त्री दीपक खड्का सोही अनुसन्धानका सिलसिलामा पक्राउ परेको प्रहरीको भनाइ छ ।

पूर्वप्रधानमन्त्री तथा नेपाली कांग्रेसका सभापति शेरबहादुर देउवा र उनको परिवारका सदस्यसहित उनको सचिवालयका केही व्यक्तिमाथि अनुसन्धान अगाडि बढाइएको प्रहरी स्रोतले नेपाल प्रेसलाई बतायो ।

जेन-जी आन्दोलनकै क्रममा नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ र उनकी छोरी गंगा दाहालको घरमा रकम फेला परेको थियो । आगोले नष्ट हुन बाँकी उक्त रकमको मुचुल्का उठाइएको र थप अनुसन्धान भइरहेको प्रहरीले जनाएको छ । प्रचण्डकी छोरी तथा स्वकीय सचिव गंगा दाहालको ललितपुर महानगरपालिका-२६ सुनाकोठीस्थित घरमा आगलागी हुँदा नगद भेटिएको थियो ।

यससँगै नेकपा एमालेका अध्यक्ष तथा तत्कालीन प्रधानमन्त्री केपी शर्मा ओली र उनको सचिवालयका केही व्यक्तिमाथि सम्पत्ति शुद्धीकरणमा अनुसन्धान गरिने भएको प्रहरी स्रोतले जनाएको छ ।