हर्मुज जलमार्ग बन्द गर्ने अधिकार कुनै पनि देशलाई नभएको अन्तर्राष्ट्रिय समुद्री सङ्गठनको भनाइ

काठमाण्डौ । अमेरिका र इरान युद्धका कारण अवरुद्ध भएको स्ट्रेट अफ हर्मुजमा पानीजहाज रोक्ने कानुनी अधिकार कुनै पनि देशलाई नभएको राष्ट्रसङ्घको सामुद्रिक निकायले बताएको छ ।

अन्तर्राष्ट्रिय समुद्री सङ्गठन (आईएमओ)का महासचिव आर्सेनियो डोमिन्गुएजले इरानविरुद्ध अमेरिका र इजरायलले आक्रमण गरेपछि युद्ध शुरू भएको ६ हप्तापछि हर्मुज जलमार्ग अवरुद्ध हुनु अन्तर्राष्ट्रिय कानुन विपरीत भएको बताउनुभएको एएफपीले जनाएको छ ।

अमेरिकाले हिजोदेखि हर्मुज र वरपरका इरानी बन्दरगाहहरूमा नाकाबन्दी घोषणा गरेको छ । यो क्षेत्र अहिले इरानी सेनाले नियन्त्रणमा राखेको अन्तर्राष्ट्रिय सञ्चारमाध्यमहरूले जनाएका छन् । अन्तर्राष्ट्रिय कानुनले कुनै पनि देशलाई अन्तर्राष्ट्रिय पार वहनका लागि प्रयोग हुने जलमार्गको प्रयोगको स्वतन्त्रतालाई निषेध वा अवरुद्ध गर्ने अधिकार नरहेको आईएमओ प्रमुखले स्पष्ट पार्नुभएको छ ।

इरानले आफ्ना सहयोगी देशका जहाजहरूलाई जलमार्ग पार गर्न अनुमति दिइरहेको छ भने केही देशहरूलाई पैसा तिर्नुपर्ने बताएको छ । मध्यपूर्व र विशेष गरी हर्मुज क्षेत्रमा देखिएको संकटलाई सम्बोधन गर्न र जहाज सञ्चालनमा मद्दत गर्न सङ्गठनले पहल शुरू गरेको जनाएको छ ।

यसैबीच संयुक्त राष्ट्र संघले ‘सबै पक्ष’लाई हर्मुज जलमार्गमा आवागमन स्वतन्त्रताको सम्मान गर्न आग्रह गरेको छ । राष्ट्र संघका प्रवक्ता स्टेफान दुजारिकले महासचिव एन्टोनियो गुटेरेसको भनाइ उद्धृत गर्दै हर्मुजमा आवागमन स्वतन्त्रताको सम्मान गर्न सबै पक्षलाई आह्वान गर्नुभएको अलजजिराले जनाएको छ ।

वाशिङ्टन र तेहरानबीच इस्लामाबादमा भएका वार्ता असफल भएपछि अमेरिकी सेनाले इरानी समुद्री आवागमनमाथि नाकाबन्दी लागू गरेपछि मध्यपूर्वमा तनाव थप चर्किँदै गएको छ ।

युद्धका कारण अन्तर्राष्ट्रिय बजारमा ऊर्जा सङ्कट बढ्दै गएको छ भने विश्व अर्थतन्त्र प्रभावित हुने सङ्केत देखिएको छ ।