मलेसियाको सबाहमा ठूलो आगलागीमा परी १ हजार घर जलेर नष्ट

काठमाडौँ । मलेसियाको सबाह राज्यको सान्दाकान जिल्लामा हिजो भएको आगलागीमा झण्डै १ हजार घर पूर्ण रूपमा नष्ट भएका छन् भने ९ हजारभन्दा बढी मानिस प्रभावित भएका छन् । आगलागी स्थानीय समयअनुसार आईतबार राति झण्डै साढे १ बजे शुरु भएको थियो ।

तीव्र हावा र घरहरू एकआपसमा निकै नजिक भएकाले आगो छिटो फैलिएको रोयटर्सले जनाएको छ । आगलागी सबाहका ‘वाटर भिलेज’ अर्थात पानीमाथि खम्बामा बनाइएका काठका घरहरू भएको बस्तीबाट सल्किएको हो ।

त्यहाँ मुख्यतः गरिब, आदिवासी तथा राज्यविहीन समुदायका मानिसहरू बसोबास गर्दै आएका छन् । स्थानीय प्रहरीका अनुसार घटनामा कुनै मानवीय क्षति भएको छैन, तर हजारौं मानिस विस्थापित भएका छन् ।

मलेसियाका प्रधानमन्त्री अनवर इब्राहिमले पीडितहरूको सुरक्षालाई पहिलो प्राथमिकता दिइएको भन्दै संघीय सरकार र सबाह राज्य सरकार मिलेर राहत तथा अस्थायी बसोबासको व्यवस्था गरिरहेको बताउनु भएको छ ।