सर्वदलीय बैठकमा प्रचण्डको सुझाव: ‘यस्तो बेला प्रधानमन्त्रीले पहलकदमी लिनपर्छ’

काठमाडौँ । नेपाली कम्युनिस्ट पार्टी (नेकपा)का संयोजक एवम् पूर्व प्रधानमन्त्री पुष्पकमल दाहाल प्रचण्डले संवेदनशील समयमा सबै पक्षले संयमता अपनाउँदै सामाजिक सद्भाव र आपसी विश्वास कायम राख्न अग्रसर हुनुपर्ने बताएका छन् । उनले यस्तो बेला प्रधानमन्त्रीले नै पहलकदमी लिन पर्ने बताए ।

सुनसरी घटनाबारे रास्वपा सभापति रवि लामिछानेले आह्वान गरेको सर्वदलीय बैठकमा सहभागी संयोजक प्रचण्डले विगतमा भूकम्प, बाढी–पहिरोजस्ता विपद्का बेला होस् वा संविधान निर्माणजस्तो जटिल प्रक्रियामा दलहरुले साझा सहमति र राष्ट्रिय एकताको उदाहरण प्रस्तुत गरेका उनले बताए ।

उनले भने, ‘आज पनि त्यही राजनीतिक परिपक्वता, संवाद र जिम्मेवारी आवश्यक छ।’

उनले भने, ‘राष्ट्रिय महत्त्वका संवेदनशील विषयमा राष्ट्रिय स्वतन्त्र पार्टी नेतृत्वको सरकार किन साझा समाधानतर्फ अग्रसर हुन सकिरहेको छैन भन्ने गम्भीर प्रश्न उठेको छ।’

उनले यस्तो अवस्थामा सरकार अझ जिम्मेवार, सक्रिय र संवेदनशील बन्नुपर्ने बताए । प्रधानमन्त्रीले तत्काल सबै राजनीतिक दललाई विश्वासमा लिएर सर्वदलीय संवाद र सहमतिको पहल गर्न उनले सुझाव दिए ।

उनले भने, ‘बल प्रयोग कुनै पनि समस्याको दीर्घकालीन समाधान हुन सक्दैन । संवाद, सहमति र राजनीतिक समझदारीमार्फत नै परिस्थितिलाई सहज बनाउन सकिन्छ।’

उनले अहिले राजनीतिक तिक्तता बढाउने समय नभएको र राष्ट्रिय जिम्मेवारी प्रदर्शन गर्ने समय भएको बताए । उनले घटनाको निष्पक्ष छानबिन गरी दोषीलाई कारबाहीको दायरामा ल्याउन आग्रह गरे ।