पठाओका सञ्चालक बस्नेत काठमाडौँ–१ बाट चुनाव लड्ने

काठमाडौँ । राइड सेयरिङ एप पठाओका सञ्चालक असिममान सिंह बस्नेतले आगामी प्रतिनिधि सभा निर्वाचनमा काठमाडौँ क्षेत्र नं. १ बाट उम्मेदवारी दिने घोषणा गरेका छन्।

बस्नेतले आफूलाई उद्यमीको रूपमा नेपालमै बसेर संघर्ष गरेको र रोजगारी सिर्जना गरेको अनुभवको आधारमा राजनीतिक जिम्मेवारी लिन लागेको बताए। उनले भने, “राजनीति गर्न होइन, जिम्मेवारी लिन आएको हुँ।”

उम्मेदवारका रूपमा बस्नेतले मुख्य तीनवटा एजेन्डा अघि सारेका छन्:

1. उद्यमशीलता र स्टार्टअपलाई समर्थन: युवा पुस्ताले नेपालमै सपना देखेर त्यसलाई कार्यान्वयन गर्न सक्ने वातावरण सिर्जना गर्ने।

2. सुशासन कायम गर्नु: काम गर्नेले जवाफदेही र निर्णय गर्नेले जिम्मेवारी लिनुपर्ने व्यवस्था सुनिश्चित गर्ने।

3. अनुभवी र युवा पुस्ताबीच सहकार्य: संवाद, मार्गदर्शन र सहकार्यको माध्यमबाट समाजलाई एकजुट बनाउने।

बस्नेतले सबैको सुझाव, आलोचना र सहभागिता आवश्यक रहेको भन्दै परिवर्तनको यात्रामा सहभागी हुन आम नागरिकलाई आग्रह गरेका छन्।