-
कालोपाटी सम्बाददाता
काठमाडौँ । प्रधानमन्त्री पुष्पकमल दाहाल ‘प्रचण्ड’ले मुलुकको अर्थतन्त्र बलियो बन्दै गएको बताएका छन् । दोलखा उद्योग वाणिज्य सङ्घले शुक्रबार आयोजना गरेको महोत्सवको उद्घाटन गर्दै प्रधानमन्त्री दाहालले यस्तो बताएका हुन् ।
उनले आफू सरकारको नेतृत्वमा आउँदाको समयमा जस्तो अर्थतन्त्र कमजोर नभएको भन्दै अर्थतन्त्रमा सुधार देखिएको जानकारी दिएका छन् । प्रधानमन्त्री दाहालले भने, ‘पछिल्लो समय विप्रेषण र राजस्व बढेको छ, विदेशी मुद्रा सञ्चिति पनि बढेको छ । अर्थतन्त्रमा सुधारले मुलुकमा उत्साह देखिएको छ ।’ उनले आफ्नो कार्यकालमा अर्थतन्त्र सुधारोन्मुख रहेको भन्दै अब फरक ढङ्गले काम गर्ने प्रतिबद्धता व्यक्त गरेका छन् ।
प्रधानमन्त्री दाहालले दोलखाको उत्पादन बढाउन र पर्यटक बढाउनका लागि महोत्सवले सहयोग गर्ने विश्वास व्यक्त गर्दै गत वर्षको तुलनामा दोलखाको आर्थिक अवस्था राम्रो भएको बताएका छन् । उनले चीनदेखि दोलखा हुँदै भारत जोड्ने राजमार्ग निर्माणलाई सरकारले दीर्घकालीन योजनामा राखेकोसमेत बताएका छन् ।
उनले दोलखामा ‘फिल्म सिटी’ निर्माणका लागि सरकारको सहयोग रहनेसमेत स्पष्ट पारेका छन् ।
