चिउरा मिलमा आगलागी हुँदा १ करोड ५० लाख रुपैयाँकको क्षति

काठमाडौँ । मोरङको पथरीमा आगलागी हुँदा १ करोड ५० लाख रुपैयाँकको क्षति भएको छ । मोरङको पथरी शनिश्चरे वडा नं १ बुद्धचोकमा रहेको कोशी चिउरा मिलमा शनिबार राती आगलागी हुँदा १ करोड ५० लाख रुपैयाँको क्षति भएको हो ।

मिलमा राति १२ बजे आगलागी हुँदा मिलका मेसिनरीसहित त्यहाँ राखिएको अन्न खरानी भएको छ । मिलमा आगो सल्केको दुई घण्टापछि मात्र स्थानीयले थाहा पाएका थिए । स्थानीय, नेपाल प्रहरी र सशस्त्र प्रहरी बलको सहयोगमा आगो निभाइएको थियो ।

उक्त मिलमा कोही नबस्ने भएकाले मानवीय क्षति भने नभएको त्यहाँका स्थानीयवासीले जनाएका छन् । आगो निभाउन पथरीशनिश्चरे, उर्लाबारी, कानेपोखरी र बेलबारी नगरपालिकाका दमकल प्रयोग गरिएको थियो । आगलागीको कारणबारे यकिन जानकारी प्राप्त नभएको प्रहरी कार्यालय पथरीले जनाएको छ ।