सांसदहरूको शपथ र पहिलो बैठक बहुउद्देश्यीय हलमा हुने

काठमाडौँ । प्रतिनिधि सभाका नवनिर्वाचित सांसदहरूको पद तथा गोपनीयताको शपथ र प्रारम्भिक बैठकहरू सिंहदरबारभित्र पुतली बगैँचामा बन्न लागेको नयाँ संसद् भवनको बहुउद्देश्यीय हलमा हुने भएका छन् ।

नयाँ भवनमा बैठकका लागि बनाइएको हल निर्माण हुन समय लाग्ने भएपछि सङ्घीय संसद् सचिवालयले बहुउद्देश्यीय हल तत्कालका लागि प्रयोग गर्न तयारी गरिरहेको हो ।

सचिवालयका प्रवक्ता सहसचिव एकराम गिरीले शपथ ग्रहण र प्रारम्भिक बैठकहरूका लागि वैकल्पिक हलको व्यवस्था गरिएको जानकारी दिए ।

‘पुतली बगैँचामा बन्न लागेको नयाँ भवनमा प्रतिनिधिसभाको बैठक बस्नका लागि बनाउन लागिएको हल तत्काल निर्माण सम्पन्न हुने अवस्था देखिएन । त्यसैले शपथ ग्रहण र प्रारम्भिक बैठकहरूका लागि बहुउद्देश्यीय हल तयार गरिरहेका छौँ,’ प्रवक्ता गिरीले रातोपाटीसँग भने, ‘३ दिनभित्र तयार भइसक्छ । सचिवालयको प्रयोगका लागि निर्माण गरिएको हो । अहिले काम चलाउन त्यसैलाई प्रयोग गर्न लागेका हौँ ।’

संसद् भवनको बैठक बस्ने नियमित हल बन्न कति समय लाग्छ भन्ने यकिन नभएको उनको भनाइ छ । गत फागुन २१ गते भएको निर्वाचनबाट नयाँ सांसदहरू निर्वाचित भएका आएका छन् । ती सांसदहरूको शपथ कहिले हुने र पहिलो बैठक कहिले बस्ने भन्ने यकिन भइसकेको छैन।