रुकुम पूर्वमा अटो दुर्घटना हुँदा एक बालिकाको मृत्यु ,चारजना घाइते

काठमाडौँ । रुकुम पूर्वको सिस्ने गाउँपालिका ६ पाखागाउँमा अटो दुर्घटना हुँदा एक बालिकाको मृत्यु भएको छ भन अन्य चारजना घाइते भएका छन्।

मृत्यु हुनेमा सिस्ने ६ खोपिचारकी १२ वर्षीया विष्णु बुढामगर रहेकी प्रहरीले जनाएको छ।

जिल्ला प्रहरी कार्यालय रुकुमपूर्वका सूचना अधिकारी प्रहरी निरीक्षक हिमबहादुर केसीका अनुसार दुर्घटनामा सिस्ने गाउँपालिका ६ का १६ वर्षीय महेन्द्र बुढा मगर, सोही वडाकै १४ वर्षीया सुशीला बुढामगर, ११ वर्षीया सुस्मिता बुढामगर र अटोचालक सिस्ने गाउँपालिका ५ का ४० वर्षीय टोपबहादुर कार्की घाइते भएका छन्।

गम्भीर घाइते अवस्थाका १६ वर्षीय महेन्द्रलाई थप उपचारका लागि नेपालगञ्ज पठाएको छ। अन्य तीनजनाको अवस्था सामान्य रहेको र जिल्ला अस्पताल रुकुमकोटमा उपचार भइरहेको प्रहरी निरीक्षक केसीले बताए।

अटो अनियन्त्रित भई सडकबाट ५० मिटर तल खसेको प्रहरीले जनाएको छ। रासस