इन्धनको भाउ यथावत्

काठमाण्डौ । नेपाल आयल निगमले पेट्रोलियम पदार्थको खुद्रा बिक्री मूल्य यथावत् राखिएको जनाएको छ । भारतीय आयल कर्पोरेसनबाट प्राप्त नयाँ खरिद मूल्य र स्वचालित मूल्य प्रणालीअनुसार मूल्य समायोजन हुन नसकेको निगमको भनाइ छ ।

यसअघि जस्तै पहिलो वर्ग चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा पेट्रोलको भाउ प्रतिलिटर १९४ रुपैयाँ ५० पैसा र डिजेल तथा मट्टितेलको भाउ १९२ रुपैयाँ ५० पैसा कायम गरिएको छ ।

यस्तै दोस्रो वर्ग सुर्खेत र दाङमा पेट्रोलको भाउ प्रतिलिटर १९६ रुपैयाँ र डिजेल तथा मट्टितेलको भाउ १९४ रुपैयाँ तथा तेस्रो वर्ग काठमाण्डौ, पोखरा र दिपायलमा पेट्रोलको भाउ प्रतिलिटर १९७ रुपैयाँ र डिजेल तथा मट्टितेलको भाउ १९५ रुपैयाँ नै यथावत् राखिएको निगमले जनाएको छ ।