काठमाडौं । प्रधानमन्त्री बालेन्द्र शाह (बालेन) को निजी सचिवालयमा कार्यरत पदाधिकारी तथा कर्मचारीहरूको जिम्मेवारी र भूमिका बाँडफाँट गरिएको छ। प्रधानमन्त्रीलाई नीति निर्माण, प्रशासनिक काम, सुशासन तथा विभिन्न मन्त्रालय र सरकारी निकायबीच समन्वयमा सहयोग पुर्याउन सचिवालयका सदस्यहरूलाई विषयगत जिम्मेवारी तोकिएको हो।
प्रधानमन्त्रीको निजी सचिवालयमा पाँच जना सल्लाहकार, दुई जना स्वकीय सचिव, पाँच जना संयोजक र पाँच जना उपसंयोजक रहेका छन्। सचिवालयमा मुख्य सल्लाहकारदेखि विषयगत संयोजक र उपसंयोजकसम्मको जिम्मेवारी छुट्याइएको छ।
प्रधानमन्त्रीका मुख्य सल्लाहकारमा कुमार व्यञ्जनकार रहेका छन्। उनी अवैतनिक रूपमा मन्त्रीसरहको भूमिकामा कार्यरत छन्। त्यस्तै, असीम शाहलाई राजनीतिक सल्लाहकार र प्रा.डा. जगदीशप्रसाद अग्रवाललाई स्वास्थ्य सल्लाहकारको जिम्मेवारी दिइएको छ। शाह र अग्रवाल पनि मन्त्रीसरहको पदीय भूमिकामा छन्।
त्यसैगरी, सुदीप ढकाल नीति, प्रशासन तथा सुशासन सल्लाहकारका रूपमा कार्यरत छन्। उनलाई राज्यमन्त्रीसरहको भूमिका दिइएको छ। विवेक मिश्र सूचना तथा सञ्चार प्रविधि सल्लाहकारका रूपमा जिम्मेवारीमा छन्। उनको भूमिका पनि राज्यमन्त्रीसरह रहने व्यवस्था गरिएको छ।
प्रधानमन्त्री शाहका दुई जना स्वकीय सचिव रहेका छन्। सुवास शर्मा राजपत्रांकित विशिष्ट श्रेणीसरहको भूमिकामा छन् भने नवीन भण्डारी राजपत्रांकित प्रथम श्रेणीसरहको भूमिकामा स्वकीय सचिवका रूपमा कार्यरत छन्।
सञ्जिव पाण्डेलाई विकास तथा मन्त्रालयगत समन्वयको जिम्मेवारी
प्रधानमन्त्रीको निजी सचिवालयमा पाँच जना संयोजकलाई विभिन्न विषयगत क्षेत्रको जिम्मेवारी दिइएको छ। सञ्जिव पाण्डेलाई विकास तथा मन्त्रालयगत समन्वय संयोजकको जिम्मेवारी दिइएको छ। उनको जिम्मेवारी विभिन्न मन्त्रालयसँग सम्बन्धित विकासका काम र योजनाबीच समन्वय गर्नु रहेको छ।
त्यस्तै, सन्तोष गिरीलाई अन्तरनिकाय समन्वय संयोजक र विशाल अधिकारीलाई सरकारी मामिला तथा योजना समन्वय संयोजकको जिम्मेवारी दिइएको छ। दिपा दाहाल मिडिया व्यवस्थापन संयोजक तथा विश्व राई सामाजिक विकास समन्वय संयोजक बनेका छन्। पाँचै जना संयोजक राजपत्रांकित प्रथम श्रेणीसरहको भूमिकामा कार्यरत छन्।
सचिवालयमा पाँच जना उपसंयोजकलाई पनि विषयगत जिम्मेवारी तोकिएको छ। सुसन गौतमलाई नागरिक उड्डयन समन्वय, रवि किरण अधिकारीलाई सामाजिक विकास समन्वय र प्रकृति ढकाललाई स्वास्थ्य समन्वयको जिम्मेवारी दिइएको छ।
त्यस्तै, विनय शाक्यलाई संस्कृति तथा सम्पदा समन्वय र दीपकप्रसाद ओलीलाई नीति मस्यौदा अध्ययनको जिम्मेवारी दिइएको छ। उपसंयोजकहरू राजपत्रांकित द्वितीय श्रेणीसरहको भूमिकामा रहेर काम गरिरहेका छन्।
सचिवालयमा जिम्मेवारी बाँडफाँटसँगै विकास तथा मन्त्रालयगत समन्वयदेखि सरकारी योजना, स्वास्थ्य, सामाजिक विकास, सञ्चार र संस्कृति तथा सम्पदासम्मका विषयलाई छुट्टाछुट्टै जिम्मेवारीमा राखिएको छ। विशेषगरी सञ्जिव पाण्डेलाई दिइएको विकास तथा मन्त्रालयगत समन्वयको जिम्मेवारीले विभिन्न मन्त्रालयका विकाससम्बन्धी काम र योजनाबीच समन्वय गर्ने भूमिका समेटेको छ।
यसरी सल्लाहकार, स्वकीय सचिव, संयोजक र उपसंयोजकमार्फत प्रधानमन्त्रीको निजी सचिवालयको कार्यविभाजन गरिएको छ। यसले प्रधानमन्त्रीलाई विभिन्न विषयमा सुझाव लिन, सरकारी निकायबीच समन्वय गर्न र नीतिगत तथा प्रशासनिक काम अघि बढाउन सहयोग पुग्ने अपेक्षा गरिएको छ।
सुनचाँदी
विनिमयदर
मिति रुपान्तरण
पेट्रोलको भाउ
तरकारी / फलफूल
मेरो एउटा कुरा छ
AQI
मौसम
रेडियो लाइभ
बैंक ब्याजदर
युनिकोड टुल्स
सेयर मार्केट्स
सिनेमा बोर्ड
निर्वाचन पोर्टल
NPL
प्रतिक्रिया दिनुहोस्