केबलकार बनाउने विवादका कारण ताप्लेजुङमा यातायात ठप्प

काठमाडौँ । ताप्लेजुङमा मंगलबार यातायातका साधन सञ्चालनमा रोक लगाइएको छ । पाथीभरा मन्दिर क्षेत्रमा केबलकार बनाउन नहुने भन्दै आन्दोलनरत मुक्कुमलुङ संरक्षण अन्तर्दलीय संघर्ष समितिले यातायात बन्दको आह्वान गरेको हो ।

बन्दका कारण निजी तथा सार्वजनिक सवारीसाधन ठप्प रहेको जिल्ला प्रहरी कार्यालय ताप्लेजुङका डीएसपी रवि रावलले जानकारी दिए । एम्बुलेन्ससहित आकस्मिक सेवाका सवारीसाधनमा भने अवरोध नरहेको उनले बताए । उनका अनुसार, व्यापार–व्यवसाय, कार्यालय भने खुला छन् ।

पाथीभरा मन्दिर क्षेत्रमा केबलकार बनाउन नहुने बताउँदै आएका स्थानीवासी र प्रहरीबीच गएको शनिबार झडप भएको थियो । त्यसक्रममा प्रहरीले गोली चलाएको थियो । गोली लागेर घाइते भएका दुईसहित तीन प्रदर्शनकारीको उपचार जारी छ ।

उक्त घटनापछि संघर्ष समितिले यातायात बन्दसहितका आन्दोलनका कार्यक्रम घोषणा गरेको हो ।