मेडिकल व्यवसायी दुर्गा प्रसाईं पक्राउ

काठमाडौं । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’का संयोजक दुर्गा प्रसाईँ फेरि पक्राउ परेका छन् ।

प्रहरीले शुक्रबार काठमाडौंको चाल्नाखेलबाट प्रसाईँलाई नियन्त्रणमा लिएको हो । उनीविरुद्ध साइबर ब्युरोमा उजुरी परेपछि पक्राउ गरिएको प्रहरी स्रोतले जनाएको छ ।

प्रसाईँ दुई साताअघि मात्र हाजिरी जमानीमा रिहा भएका थिए । तर, पुनः उजुरीका आधारमा उनलाई प्रहरीले आज फेरि पक्राउ गरेको हो ।

यसअघि नेपाली कांग्रेसको आधिकारिकतासम्बन्धी निर्वाचन आयोगको निर्णयलाई लिएर गगन थापामाथि आर्थिक चलखेल भएको भन्दै भ्रमपूर्ण अभिव्यक्ति दिएको आरोपमा उनी पक्राउ परेका थिए । सो विषयमा कारबाही गर्न निर्वाचन आयोगले साइबर ब्युरोलाई पत्राचारसमेत गरेको थियो ।