तारकेश्वर मनमैजुमा सर्वसाधरणको घरभित्र भेटियो चितुवा, आक्रमणमा २ जना घाइते

काठमाडौं । काठमाडौंको तारकेश्वर नगरपालिकाको मनमैजु मन्दिर नजिक चितुवाले आक्रमण गर्दा २ जना घाइते भएका छन् ।

आज दिँउसो १ बजे तारकेश्वर नगरपालिका वडा नं १० मनमैजु मन्दिर नजिकै चितुवाले आक्रमण गर्दा तारकेश्वर नगरपालिका वडा नं१० मनमैजु नासलचोक का ६५ वर्षीय दुलाल महर्जन र अर्का ५५ वर्षीय मायानाथ वाग्ले घाइते भएका हुन् ।

महर्जनको टाउको र बाँया हातमा सामान्य चोट लागेको छ । उनको शुभम् अस्पताल मनमैजु लोकतान्त्रिक चोकमा उपचार भइरहेको छ ।

त्यस्तै चितुवाको आक्रमणबाट घाइते भएका वाग्लेको दाहिने कान र बाँयाको हातमा चोट लागेको छ । उनको नेपाल आर्मी अस्पताल छाउनीमा उपचार भइरहेको छ ।

आक्रमण गर्ने चितुवा मनमैजुस्थित ठुलो ईनार नजिक अनोजमणी अधिकारीको घर भित्र छिरेको थियो । घरभित्र चितुवा छिरेपछि स्थानीयले प्रहरीलाई खबर गरेका थिए ।

उक्त घटनाको बारेमा थप अनुसन्धान कार्य जारी रहेको जिल्ला प्रहरी परिसर काठमाडौंका प्रवक्ता एसपी पवन भट्टराईले बताए । चितुवा उद्धारको लागि काठमाडौं डिभिजन वन कार्यालयसँग समन्वय भई सकेको उनले बताए ।