रौतहट-२मा कांग्रेसका डा.आलम निर्वाचित

काठमाडौँ । रौतहट -२मा नेपाली कांग्रेसका डा. मो. फिरदोश आलम प्रतिनिधिसभा सदस्यमा विजयी भएका छन् । आइतबार सम्पन्न प्रतिनिधिसभा सदस्य निर्वाचनमा उनले २९ हजार ५ सय २८ मत प्राप्त गरेको निर्वाचन अधिकृत सीताराम खड्काले जानकारी दिए ।

नवनिर्वाचित डा. आलमका निकटतम प्रतिस्पर्धी नेपाल कम्युनिष्ट पार्टीका उम्मेदवार किरणकुमार साहले १८ हजार ४ सय ४२ मत प्राप्त गरेका छन् ।

यो क्षेत्रको अन्तिम मतपरिणामअनुसार राष्ट्रिय स्वतन्त्र पार्टीका उम्मेदवार शेख सगिरले नौ हजार ३ सय २५ मत, जनता समाजवादी पार्टी, नेपालका रामअशिष राय यादवले दुई हजार ९ सय ६० मत ल्याएर चौथो र नेकपा एमालेका उम्मेदवार मोहम्मद अतिउल्लाहले दुई हजार ३ सय ८२ मत प्राप्त गरेका छन् ।

यो क्षेत्रमा एक लाख आठ हजार ८ सय ७२ मतदाता रहेकामा ७१ हजार ५ सय ४६ जनाले मतदान गरेका थिए । ६६ हजार १ सय ४४ मत सदर र पाँच हजार ४ सय २ मत बदर भएको निर्वाचन अधिकृत खड्काले जानकारी दिए ।