-
कालोपाटी सम्बाददाता
काठमाडौं । काठमाडौं महानगरपालिकासहित ७ स्थानीय तहको मतगणनाको अन्तिम मत परिणाम आउन बाँकी रहेको छ । निर्वाचन आयोगका अनुसार दाङको तुल्सीपुर उपमहानगरपालिकाको अन्तिम मतपरिणाम आउन बाँकी रहेको छ । जहाँ एमालेबाट मेयर र उपमेयर विजय हुने निश्चित भइसकेको छ ।
यस्तै कपिलवस्तुको महाराजगन्ज नगरपालिकाको नतिजा आउन बाँकी रहेको छ । यस्तै रुपन्देहीको तिलोत्तमा नगरपालिका, रौतहटको फतुवा विजयपुरको नतिजा आउन बाँकी छ । ती स्थानीय तहमा पनि काँग्रेसकै आग्रता रहेको छ ।
विवादका कारण रोकिएको उदयपुरको त्रियुगा नगरपालिकाको मंगलबारदेखि मात्रै मतगणना सुरु भएको छ भने काठमाडौं महानगरपालिकाको मतगणना पनि जारी रहेको छ। काठमाडौंमा स्वतन्त्र उम्मेदवार बालेन्द्र साह विजयी हुने देखिएको छ ।
यसैबीच बाजुराको बुढीगंगा नगरपालिकाको मतगणना भने अझै सुरु हुन सकेको छैन । निर्वाचन आयोगका अनुसार मतदानमा धाँधली भएको भन्दै दलहरुले बुढीगंगा नगरपालिकामा मतगणना सुरु हुन नदिएका हुन् । त्यहाँ धाँधली भएकाले पुनः निर्वाचन हुनुपर्ने माग समेत उठेकाले के गर्ने भन्नेबारे आयोगले निर्णय गर्न सकेको छैन । बरु त्यहाँका निर्वाचन अधिकृतले बीचैमा राजीनामा दिएपछि थप समस्या उत्पन्न भएको छ ।
