-
कालोपाटी सम्बाददाता
काठमाडौं । लोकतान्त्रिक समाजवादी पार्टी नेपालको कार्यकारिणी समितिको बैठक स्थगित भएको छ । चुनावी गठबन्धन, संगठन विस्तारलगायतका विषयमा छलफलका लागि बोलाइएको बैठकमा प्रस्तुत हुने एजेण्डाको तयारी पूरा नभएको कारण बैठक स्थगित भएको हो ।
चुनावी गठबन्धनका लागि दलहरुसँग अझै केही छलफल गर्ने, एउटा निष्कर्षमा पुगेपछि बैठकमा त्यसलाई एजेण्डाको रुपमा राख्ने योजना अनुसार आजको बैठक स्थगित भएको पार्टीका नेता मनिष मिश्रले जानकारी दिएका छन् । लोसपाले चुनावी गठबन्धनका लागि काँग्रेस, एमाले, जसपा, जनमत, नागरिक उन्मुक्ति पार्टीलगायतसँग छलफल गरिरहेको छ । तर कुन दलसँग गठबन्धन गर्ने भन्नेबारे अहिलेसम्म टुङ्गो लागेको छैन ।
लोसपा पाँच दलीय सत्ता गठबन्धनमा सहभागी हुन सकारात्मक देखिएको छ । लोसपाले आइतबार संसदीय दलको बैठकपछि प्रधानमन्त्री शेरबहादुर देउवालाई भेटेर सत्ता गठबन्धन तथा सरकारको विषयमा छलफल गरेको छ । गठबन्धन र सत्ता सहकार्यको विषयमा माओवादी केन्द्रका अध्यक्ष प्रचण्ड जापानबाट फर्केपछि टुङ्गो लाग्ने आश्वासन प्रधानमन्त्री देउवाले दिएका छन् । गठबन्धनको विषयमा केही टुङ्गो लागेपछि कार्यकारिणी समितिको बैठक बस्ने पार्टीले बताएको छ ।
