-
कालोपाटी सम्बाददाता
काठमाडौँ । रुकुम पूर्वमा यस वर्ष महको उत्पादन दोब्बरले वृद्धि भएको छ । गत वर्ष विभिन्न कारणले मह उत्पादन घटेको थियो । जिल्लाको सिस्ने गाउँपालिकाको वडा नम्बर २ र ३ मा मौरीपालन हुँदै आएको छ ।
सिस्ने-३ का ओमप्रकाश खड्काले २ सय ५० धार्नी मह बिक्री गरेर यो याममा ७ लाख ५० हजार रुपैयाँ आम्दानी गरेका छन् । अब १ सय ४० धार्नी मह बिक्री हुन बाँकी रहेको उनले बताएका छन् । किसान खड्काले भने, ‘यस वर्ष राम्रो मह उत्पादन भएको छ । मैले यो याममा मौरी घारबाट निकालेको मह सबै बिक्री भयो भने १२ लाख रुपैयाँ कमाउँछु । सोही वडाका अर्का मौरीपालक किसान कमलाल खड्काले पनि ६० घारबाट १ सय ८० धार्नी मह निकालेका छन् । मह निकाल्न अझै दश मौरीका गोला बाँकी छन् भने १ सय ८ धार्नी मह बिक्री भइसकेको छ ।’
उनले बिक्री भएको महबाट ३ लाख २४ हजार रुपैयाँ आम्दानी गरेका छन् । अझै ७२ धार्नी मह बिक्री हुन बाँकी छ । उनले भने, ‘यो याममा ७ लाख रुपैयाँ बराबरको आम्दानी हुने भएको छ ।’ एक धार्नीमा साढे दुई किलो मह हुने गर्छ । एक किलो मह लाई १२ सयसम्ममा बिक्री हुने गरेको जनाइएको छ । यस क्षेत्रको मह रुकुम पश्चिम, दाङ, सल्यान, जाजरकोट, नेपालगञ्ज पोखरा र काठमाडौँलगायत सहरमा पुग्ने गरेको छ । सिस्ने -३ मा यो याममा ९० लाख रुपैयाँ बराबरको मह उत्पादन भएको वडाध्यक्ष हेराम खड्काले जानकारी दिएका छन् ।
अघिल्लो वर्षका तुलनामा यस वर्ष जिल्लामा दोब्बरले मह उत्पादन भएको एकीकृत तथा पशुपन्छी विकास कार्यालय रुकुम पूर्वका कार्यालय प्रमुख पिताम्बर बस्नेतले जनाएका छन् । गत वर्ष जिल्ला मा १२ सय मौरीका गोलाबाट छ सय मेट्रिक टन मात्र मह उत्पादन भएको थियो भने यस वर्ष १७ सय मौरीका गोलाबाट १२ सय मेट्रिक टन मह उत्पादन भएको प्रारम्भिक अनुमान कार्यालयले गरेको छ । अझै पनि किसानको मह निकाल्ने काम जारी भएको हुँदा अहिल नै यति मह उत्पादन भएको छ भनेर भन्न नसकिने उनले बताएका छन् ।
उत्पादित महको ८० प्रतिशत मात्र बिक्री भयो भने पनि १ करोड १५ लाख २० हजार रुपैयाँ जिल्लामा आम्दानी हुने सो कार्यालयले जनाएको छ ।
