-
कालोपाटी सम्बाददाता
काठमाडौँँ । भक्तपुरमा एक वृद्धा हातखुट्टा बाँधिएको अवस्थामा मृत फेला परेकी छन् । जिल्ला प्रहरी परिसर, भक्तपुरका अनुसार भक्तपुर नगरपालिका ३, दरबारस्क्वायर इछुगल्लीकी ९४ वर्षीय विष्णुकुमारी त्वयना मृत फेला परेकी हुन् ।
त्वयनाको शव बुधबार साँझ ५ बजेको समयमा आफू सुत्ने कोठामा कपडाले दुबै खुट्टा एकै ठाँउमा बाँधिएको अवस्थामा मृत्त फेला परेको परिसरका प्रहरी नायब उपरीक्षक ढुण्डीराज नेउपानेले बताए ।
वृद्धा महिला घरमा एक्लै भएको मौका छोपेर चोरी गर्ने उद्देश्यले हत्या भएको हुन सक्ने स्थानीयको अनुमान छ । यद्यपि, प्रहरीले हत्या सम्बन्धी अनुसन्धान अघि बढाएको जनाएको छ ।
उनको शव पोस्टमार्टमका लागि काठमाडौं मेडिकल कलेज, दुवाकोट, पठाइएको छ । घटनाबारे थप अनुसन्धान भइरहेको छ ।
