-
कालोपाटी सम्बाददाता
काठमाडौँ । श्रीमती हत्याको अभियोगमा श्रीमान पक्राउ परेका छन् । श्रीमतीलाई कुटपिट गरी हत्या गरेको अभियोगमा झापा, दमक नगरपालिका वडा नं ७का ३४ वर्षीय विनोद राई पक्राउ परेका हुन् ।
इलाका प्रहरी कार्यालयका अनुसार इलामको माङसेवुङ घर भई हाल दमक-७ श्रीपाली टोलस्थित काजीमान श्रेष्ठको घरमा भाडामा बस्दै आएका उनले २८ वर्षीया श्रीमती ममिला राईलाई कुटपिट गरी हत्या गरेका हुन् । बुधबार राति छिमेकीको घरमा जन्मदिनको भोज खाएर करिब १ बजेतिर घर आएका बेला राई दम्पतीबीच झगडा भएको थियो । झगडाका क्रममा विनोदले श्रीमतीमाथि निर्घात कुटपिट गरेको दमक इलाका प्रहरी कार्यालयका प्रहरी नायब उपरीक्षक मनोजकुमार लामाले जानकारी दिएका छन् ।
कुटपिटबाट मृत्यु भएपछि बिहीबार बिहान स्थानीयवासीले प्रहरीलाई खबर गरेका थिए । उक्त सुचना प्राप्त गरे पश्चात प्रहरीको टोली पुगेर अभियुक्त राईलाई नियन्त्रणमा लिएको हो । सो घटनाबारे थप अनुसन्धान सुुरु भइरहेको प्रहरीले जनाएका छन् ।
