-
कालोपाटी सम्बाददाता
काठमाडौँ । क्रिप्टोकरेन्सी बिटक्वाइनको मूल्य पहिलोपटक एक लाख अमेरिकी डलर नाघ्दै नयाँ रेकर्ड बनाएको छ । नवनिर्वाचित अमेरिकी राष्ट्रपति डोनाल्ड ट्रम्पले क्रिप्टोमैत्री नीति अपनाउने अपेक्षाबीच विश्वकै ठूलो क्रिप्टोकरेन्सीको मूल्य बढेको हो ।
ट्रम्पले अमेरिकाको सेक्युरिटिज एण्ड एक्सचेन्ज कमिसन (एसईसी)का पूर्वआयुक्त पल एटकिन्सलाई फेरि वालस्ट्रिटको नियामकमा मनोनीत गर्ने बताएको केही घण्टामै बिटक्वाइनको मूल्य एक लाख अमेरिकी डलर नाघेको हो ।
ट्रम्पले नियुक्त गर्ने भनिएका एटकिन्स एसईसीका वर्तमान प्रमुख ग्यारी जेन्सलरभन्दा बढी क्रिप्टो समर्थक मानिन्छन् । अहिले विश्वको क्रिप्टो उद्योग ३।३ ट्रिलियन अमेरिकी डलर पुगेको अनुमान गरिएको छ ।
गत महिना ट्रम्प राष्ट्रपतिमा निर्वाचित भएसँगै बिटक्वाइनको मूल्य बढ्न थालेको थियो । उक्त निर्वाचनको दिनयता एक लाख अमेरिकी डलर पुग्न बिटक्वाइनको मूल्य ४० प्रतिशतले बढेको छ । ट्रम्पले अमेरिकालाई पृथ्वीको क्रिप्टो राजधानी बनाउने टिप्पणी समेत गरेका छन् । रोयटर्स
