कञ्चनपुरका बडायक दम्पतीको हत्या गरेको आरोपमा एक जना पक्राउ

काठमाडौँ । कञ्चनपुरका बडायक दम्पती हत्या प्रकरणमा संलग्न भएको आरोपमा एकजना पक्राउ परेका छन् । लालझाडी गाउँपालिका– १, बिनबारीका दम्पती  हत्याको करिब एक महिनापछि प्रहरीले एक व्यक्तिलाई पक्राउ गरेको हो ।

सुदूरपश्चिम प्रदेश प्रहरी कार्यालयका डीआईजी रवीन्द्र केसीले एक जनालाई पक्राउ गरिएको पुष्टि गरे । उनका अनुसार पक्राउ पर्नेमा स्थानीय ५० वर्षीय गंगाबहादुर राना छन् । उनलाई बुधबार नियन्त्रणमा लिएर अनुसन्धान सुरु गरिएको छ ।

८कात्तिकको बिहान मृतावस्थामा रमेश बडायक र उनकी श्रीमती कमला मृत भेटिए । रमेश घरको आँगनमा मृत भेटिएका थिए भने उनकी श्रीमती कमला बरण्डामा सुतेकै ठाउँमा मृत भेटिएकी थिइन् । रमेशको टाउको र कमलाको टाउको तथा निधारमा समेत धारिलो हतियार प्रहार गरिएको थियो ।