-
कालोपाटी सम्बाददाता
काठमाडौँ । टर्कीमा आठ जना आप्रवासीको डुबेर मृत्यु भएको छ । टर्कीको समुद्री किनारामा डुङ्गा पल्टिँदा आठ जना आप्रवासीको डुबेर मृत्यु भएको हो ।
शुक्रबार स्थानीय गभर्नरको कार्यालयले दिएको जानकारी अनुसार डुङ्गा दुर्घटनामा परेका कूल १२ जनामध्ये आठ आप्रबासीको डुबेर मृत्यु भएको छ । साथै, बाँकी चार जनाको सकुशल उद्धार भएको छ । त्यसैगरी दुर्घटनामा ज्यान गुमाएका व्यक्तिको राष्ट्रियता भने खुल्न सकेको छैन ।
टर्कीको उत्तरपश्चिमी प्रान्त क्यानाक्केलेको तटमा रहेको गोक्सिडा वा इम्ब्रोस भनिने टापुमा डुङ्गा पल्टिएको हो । अधिकारीहरूले खोजी तथा उद्धार कार्य जारी रहेको जनाएका छन् । टर्कीले अधिकांश सिरियालीसहित करिब ४० लाख शरणार्थीलाई आश्रय दिइरहेको छ ।
अङ्काराले सन् २०१६ मा युरोपेली सङ्घसँग आर्थिक सहायतालगायत विभिन्न प्रोत्साहनको बदलामा शरणार्थीहरूको आगमन रोक्न सम्झौता गरेको थियो ।
