-
कालोपाटी सम्बाददाता
काठमाडौँ । नेपाल प्रहरीले एक वर्षका अवधिमा २३ चर्चित घटनाको सफल अनुसन्धान गरेको छ । प्रहरी प्रधान कार्यालयमा बिहीबार आयोजित पत्रकार सम्मेलनमा प्रहरी महानिरीक्षक बसन्तबहादुर कुँवरले गत वर्षको चैत १० गते महानिरीक्षकको कार्यभार सम्हालेपछि २३ चर्चित घटनाको सफल अनुसन्धान सम्पन्न भएको जनाएका हुन् ।
पत्रकार सम्मेलनमा केन्द्रीय प्रहरी प्रवक्ता, प्रहरी नायव महानिरीक्षक भीमप्रसाद ढकालले एक वर्षमा ललिता निवास जग्गा प्रकरण, ६० किलोग्राम सुन, बालयौन शोषण गरेको कसुरमा रामबहादुर बमजम पक्राउलगायतका विभिन्न घटनाको सफल अनुसन्धान गरेको बताएका छन् । उनले देउराली सहकारी, हुण्डी कारोबारी पक्राउ, शिवशिखर सहकारी ठगी प्रकरण, २ किलोग्राम ६ सय ग्राम कोकिन बरामद, नक्कली भूटानी शरणार्थी प्रकरण, गैरीगाउँ सामुहिक हत्या, पेट्रोल छर्कि आगो लगाई कर्तव्य ज्यानलगायतका घटनामा सफल अनुसन्धान गरिएको जानकारी दिएका छन् ।
त्यस्तै, प्रवक्ता ढकालले एक वर्षको अवधिमा प्रहरीमा देशभर विभिन्न कसुरमा ५९ हजार ६१ मुद्दा दर्ता भएको उल्लेख गरेका छन् । दर्ता भएका मुद्दामध्ये सबैभन्दा बढी बैंकिङ कसुरमा १३ हजार २ सय ७७, सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसुरमा १० हजार ८ सय ६३ रहेका छन् । यस्तै, आत्महत्या ७ हजार १ सय ९४, लागूऔषध ४ हजार २ सय ८४, चोरी ३ हजार ७ सय २५ लगायत रहेका छन् । मुद्दा दर्ता भएकामध्ये सबैभन्दा धेरै काठमाडौँ उपत्यकामा १७ हजार ३ सय ९७ रहेको छ भने सबैभन्दा थोरै कर्णाली प्रदेशमा १ हजार ९ सय ६५ रहेको छ । प्रहरीले फैसला कार्यान्वयनतर्फ एक वर्षको अवधिमा १३ हजार १ सय २२ फरार अपराधिलाई नियन्त्रणमा लिँदा जरिवनावापत रु १ अर्ब ९७ करोड ९६ लाख १६ हजार ५ सय ३८ राजस्व सङ्कलन गरेको छ ।
सो अवधिमा प्रहरीले विभिन्न मितिमा अपराध गरी विदेश गई लुकेका १३ फरार अपराधिलाई इन्टरपोलको सहायतामार्फत नेपाल ल्याएको छ । एक वर्षको अवधिमा विपद्का घटनामा प्रहरीले ४६ हजार २ सय ५९ प्रहरी परिचालित गरेको छ भने बन्द, हड्ताल र विरोध नियन्त्रणका लागि १ लाख ४८ हजार प्रहरी परिचालन गरेको छ । सोही अवधिमा ४ सय ४४ प्रहरी घाइते हुँदा १ सय ९० प्रदर्शनकारी घाइते र तीन प्रदर्शनकारीको मृत्यु भएको प्रवक्ता ढकालले बताएका छन् । प्रहरीले एक वर्षमा अवैध सुनचाँदी, अदालती फैसला कार्यान्वयन, अवैध मुद्रा, हुण्डी कारोबारी, अवैध मालसामान, अवैध काठ, ट्राफिक कारबाहीलगायतका शीर्षकबाट रु ६ अर्ब ६३ करोड ३९ लाख ३२ हजार १ सय ७८ राजस्व सङ्कलन गरेको छ ।
प्रहरीमा हाल ७९ हजार ५ सय ४१ दरबन्दी रहेपनि ३ हजार २ सय ८९ दरबन्दी खाली हुँदा काम कारबाहीमा समस्या परेको छ । नागरिकको इच्छा, आकांक्षालाई सम्बोधन गरी अपराध नियन्त्रण गर्न २५ हजार प्रहरी जनशक्तिको थप गर्नुपर्ने आवश्यकता रहेको प्रवक्ता ढकालको भनाइ छ ।
