-
कालोपाटी सम्बाददाता
काठमाडौँ । डर, त्रास तथा धम्की दिई ५० लाख रुपैयाँ रकम माग गर्ने दुई जना पक्राउ परेका छन् । काठमाडौँ उपत्यका अपराध अनुसन्धान कार्यालयको प्रहरी टोलीले डर, त्रास तथा धम्की दिई ५० लाख रुपैयाँ रकम माग गर्ने दुई जनालाई पक्राउ गरी सार्वजनिक गरेको हो ।
पक्राउ पर्नेमा कैलाली टीकापुर नगरपालिका-१ बस्ने ३६ बर्षीय हृदयराज बोगटी उपनाम विश्वजित बटला तथा नुवाकोट ककनी नगरपालिका-३ बस्ने ३६ बर्षीय नरहरि ढुङगाना उपनाम रमेश रहेको काठमाडौँ उपत्यका अपराध अनुसन्धान कार्यालय प्रवक्ता तथा प्रहरी उपरीक्षक रवीन्द्र रेग्मीले जानकारी दिएका छन् । कार्यालय प्रवक्ता रेग्मीले भने, ‘केही व्यक्तिले योजनाबद्ध तरिकाले पीडितलाई पटक-पटक फोनमार्फत तथा प्रत्यक्ष भेट गरी डर, धम्की तथा त्रास देखाई रु ५० लाख माग गरेको भन्ने गोप्य सूचनाका आधारमा हाम्रो कार्यालयबाट खटिएको विशेष अनुसन्धान टोलीले चन्द्रगिरि नगरपालिका-९ मच्छेगाउँबाट उनीहरुलाई पक्राउ गरेको हो ।’
त्यसैगरी पक्राउ परेकाहरुलाई आपराधिक लाभ मुद्दामा थप अनुसन्धान तथा कारवाहीका लागि मंगलबार जिल्ला प्रहरी परिसर, काठमाडौँ पठाइएको हो । साथै, निजहरुका साथबाट प्रहरीले मोटरसाइकल (सु.प.प्र-०१००९ प ६६१०) एक थान, विभिन्न कम्पनीका मोबाइलहरु चार थान तथा नेपाल कम्युनिष्ट पार्टी (माओवादी)को सहयोग रसिद एक ठेली बरामद गरेको प्रवक्ता तथा प्रहरी उपरीक्षक रेग्मीको भनाइ छ ।
