नवलपरासी पूर्वको दाउन्नेमा बस पल्टेर आगलागी हुँदा ३१ जना घाइते, ६ जनाको अवस्था चिन्ताजनक

बुटवल । नवलपरासी पूर्वको दाउन्नेमा बस पल्टिएर आगलागी हुँदा ३१ जना घाइते भएका छन् । बुधबार बिहान साढे ५ बजे कञ्चनपुरबाट काठमाडौं जाँदै गरेको ना ५ ख ५१०० नम्बरको बस अनियन्त्रित भएर सडक छेउँमा पल्टिंदा आगलागी भएको थियो ।

नवलपुर प्रहरी प्रमुख डिएसपी सन्तोष पाठकका अनुसार आगलागीमा परेका मध्ये ६ जनाको अवस्था चिन्ताजनक रहेको छ । घाइते ६ जनालाई उपचारका लागि चितवनको भरतपुर पठाइएको र अन्यको स्थानीय मध्यविन्दु अस्पतालमा उपचार भइरहेको प्रहरीले जनाएको छ ।

डिएसपी पाठकका अनुसार बसमा ३१ जना सवार थिए । दुर्घटनामा परेको बस महाकाली यातायात प्रालिको हो । दुर्घटनामा घाइते भएकाहरु अधिकांश कैलाली र कञ्चनपुर जिल्लाका छन् ।